អាមេរិក៖ ជ័យជម្នះរបស់កីឡាករចិន Wu Yibing ទៅលើកីឡាករអាមេរិក John Isner នៅវគ្គផ្តាច់ព្រ័ត្របានជួយឱ្យកីឡាកររូបនេះក្លាយជាកីឡាករជនជាតិចិនដំបូងគេដែលឈ្នះពាន ATP Tour នៅក្នុងព្រឹត្តិការណ៍ Dallas Open នៅថ្ងៃអាទិត្យម្សិលមិញ។ 

កីឡាករវ័យ២៣ឆ្នាំមកពីទីក្រុង ហ័ងចូវ (Hangzhou) ខេត្តហ្សឺជាំង (Zhejiang) យកឈ្នះការប្រកួតវគ្គផ្តាច់ព្រ័ត្រដោយលទ្ធផល ៦-៧ (៤/៧), ៧-៦ (៧/៣), ៧-៦ (១៤/១២) ក្នុងរយៈពេលត្រឹមតែបីម៉ោងប៉ុណ្ណោះដើម្បីដណ្តើមបានជ័យជម្នះក្នុងព្រឹត្តិការណ៍ ATP។

Wu Yibing ជាកីឡាករដែលបានរំកិលខ្លួនយ៉ាងលឿនពីចំណាត់ថ្នាក់លេខ ១,៨៦៩ កាលពីឆ្នាំមុន មកកាន់ចំណាត់ថ្នាក់លេខ ៩៧ លេខពិភពលោកនៅឆ្នាំនេះ បានក្រាបដួលទៅលើតាបប្រកួតតែម្តង ក្រោយសម្រេចបានជ័យជម្នះជាលើកដំបូងរបស់ខ្លួននេះ។ 

ក្រោយជ័យជម្នះនេះ Wu បាននិយាយដោយមោទនភាពថា៖ "ខ្ញុំបានបង្កើតប្រវត្តិសាស្រ្តនៅទីនេះសម្រាប់ប្រទេសរបស់ខ្ញុំ។ ខ្ញុំពិតជាមានមោទនភាពខ្លាំងណាស់។ មែនទែនទៅ! នេះគឺជាការប្រកួតដ៏លំបាកបំផុតមួយដែលខ្ញុំបានជួបប្រទះ"។ 

ដោយឡែកគូប្រជែងរបស់ Wu គឺកីឡាករ John Isner វ័យ៣៧ឆ្នាំក៏បានសម្តែងការអបអរសាទរចំពោះកីឡាករវ័យក្មេងរូបនេះផងដែរដោយបាននិយាយថា កីឡាកររូបនេះនឹងមានអនាគតដ៏ត្រចះត្រចង់ជាមួយវិស័យកីឡាតេន្នីសនាពេលអនាគត។ 

គួរបញ្ជាក់ថា ជើងឯកនាពេលនេះគឺជាជំហានដ៏ធំគួរឱ្យចាប់អារម្មណ៍មួយទៀតរបស់ Wu Yibing បន្ទាប់ពីឆ្នាំមុនគេបានក្លាយជាកីឡាករមកពីចិនដំបូងគេ ដែលបានឈានដល់ជុំទី៣ នៃព្រឹត្តិការណ៍ US Open៕